Fra’ Diavolo – – Poemetto in ottava rima – di Ettore De Mura prima edizione Ediz. Bideri, Napoli, 1961 (II)

Posted by altaterradilavoro on Dic 11, 2019

Mi pregio di ospitare nelle pagine di “Lazzaro Napoletano” questo poemetto di Ettore De Mura, poeta e autore di canzoni di successo.

Il testo è riportato così come pubblicato sull’edizione in mio possesso.

E’ venuto Fra’ Diavolo:
ha portato i cannoncini
pe’ ammazza’ li Giacobini,
Ferdinando è il nostro Re!

Canto popolare del 1806 di Sora

NU GUASTO ‘E MACHINA

‘A machina curreva a ciento all’ora …
(Bona era ‘a guida e bella ‘a cammenata!)
E pe ghi’ a Roma ce vuleva ancora
n’at’ora e meza; n’ora e meza ‘e strata.
Ma ll’autista, caccianno ll’uocchie ‘a fore,
facette tanto brusca na frenata
pe nu mmalora ‘e cane accussì gruosso,
ca jettemo a fernì dint’a nu fuosso.

– Ch’è succiesso? – Ch’è stato? – Va nduvina …
Jammo, scennite e dàteme na mano.
Vedimmo si se trova n’officina …
Vuttate! … Io spero ca nun stà luntano! –
A destra ‘e na tabella celestina,
addò ce steva ‘a scritta «Per Ceprano»,
vedettemo na specie ‘e catapecchia
chiena ‘e piezze ‘e ricambio e rrobba vecchia.

– Tentammo ccà? – Che t’aggio ‘a di’, fa ‘a prova …
… S’era schiattato ‘o tubbo d”o motore
e ce vuleva na balestra nova.
S’era rotta ‘a balestra, sissignore.
– Ma chesta fino a Roma nun se trova!
– dicette ‘o masto – e ce vonno quatt’ore
pe fa’ na saldatura … ‘aggia smuntà …
E, forse, fino a Roma, po’ arrangià.

– Quatt’ore ‘n miez”a strata! Che sfurtuna! –
– Ce vuleva ‘a balestra stammatina!
‘A panza canta e nun vo’ stà diuna,
addò starrà na frasca ‘e na cantina?
I’ mangio a mmiez’juorno e songo ll’una …
– Ma chelli ccase ncimma a sta cullina
che paese sarranno? – È Itri! … – Evviva!
Nu piatto ‘e maccarune a chi ce arriva!

II

‘O PATRONE D”A CANTINA

‘E strate d’Itri songo longhe e storte,
‘e preta janca songo fatte ‘e ccase.
Ddoje cchiese ca da poco so’ risorte,
scalinatelle nfuosso e panne spase.
P”a guerra avette cannunate ‘e morte
e sulo poche cose so’ rummase.
Nun ce stà nu cafè, nu pasticciere,
stentajmo pe truvà nu canteniere (1).

– Tenite birra? – No. – dice ‘o patrone –
Tengo sultanto ‘o vino, ma è speciale:
«Muscato d”a Magliana», robba ‘e tuone!
o «Abbuoto d”a Servotta» (2) ch’è locale.
Nu vino russo … – e mmosta ‘o buttiglione –
ca tutt”o munno nun ‘o tene eguale! –
Ce porta ‘o buttiglione cu ‘e bicchiere
e s’assetta cu nuje nnant”o vrasiere.

Facettemo amicizia dint’a niente
però chiacchiariava sultant’isso …
Parlaje d”a guerra, d”e bumbardamente …
– N’ato bicchiere, meh, facite ‘o bisso!
– Nuje ccà nce briacammo, tiene mente,
‘o bicchiere se jenche troppo spisso …
Ma «Abbuoto» è buono, è na specialità
e se ne scenne senza ce penzà!

Ma tutto nzieme – forse nun se crede! –
nuje vedettemo ‘o vino ca frieva …
e ‘a miez”a scumma rossa … che se vede?! …
n’ombra ca s’allungava e ca saglieva …
– Che succede, patrò, ma che succede? –
E chillo muto e friddo cchiù d”a neva.
Ll’ombra rossa sparette ‘int”o cammino
cu na resata e cu nu surdiglino.

– Amice mieie: pecchè ve spaventate?
Chist’era ‘o vino ch’isso preferiva.
Stammo ‘o paese sujo, nun ve scurdate,
e spisso spisso ll’ombra se fa viva …
O sente ‘o vino o sente scuppettate
Fra’ Diavolo nuosto ‘e botto arriva.
E st’ombra antica nun pò fa paura
ca sulo a nu gnurante o a na criatura.

Parlanno ‘e Fra’ Diavolo, ‘o patrone,
sbatteva ‘e mmane ncopp”o tavulino
e ce metteva tutta ‘a passione
mentre veveva vino ncopp’a vino.
Entusiasmato comm’a nu guaglione,
parlava e s’accustava cchiù vicino.
E accussì pe cchiù ‘e n’ora ce parlaje
e ‘a storia ‘e Fra’ Diavolo cuntaje.

III

‘A STORIA ‘E FRA’ DIAVOLO

Chill’era nu bell’ommo: ll’uocchie nire
nun era alto e pareva nu gigante.
Buono, alla mano, disprezzava ‘e llire
e bon’azione nne faceva tante!
‘E nnenne ne jettavano suspire;
‘o vulevano bene tutte quante.
P”e tratte ca teneva e ‘a simpatia,
faceva ncantà ‘a ggente ‘n miez”a via.

E teneva ‘o curaggio ‘e nu lione
mentre teneva ‘o core ‘e pasta ‘e mèle,
ll’offesa s”a levava c”o bastone,
cu ll’amico fedele era fedele.
Se dice che quann’era nu guaglione
‘o mettettero nomme «Fra’ Michele»
pecchè teneva ‘a faccia ‘e santariello
e purtava ‘o vestito ‘a munaciello.

Cchiù grussiciello, ‘artèteca teneva;
e dint”o sciummo ne faceva bagne!
Quanta filone a’ scola che faceva
pe secutà palomme ‘int”e ccampagne!
Pe na petriata, ‘o sango lle frieva
e nne scassava lastre cu ‘e cumpagne!
Qua’ Fra’ Michele si era nzisto assaje?
E ‘a ggente «Fra’ Diavolo» ‘o chiammaje.

Nu bello juorno cunuscette ‘ammore,
n’ammore ch’era fatto ‘e tutto e niente,
n’ammore ‘e chille ca te dà calore,
tutto parole doce e vase ardente.
E quanta cammenate core a core,
quanta prumesse, quanta giuramente!
A ogne albero, si ‘e vvote essa tardava,
dduje core cu dduje nomme disignava.

Pe st’ammore felice, pe stu suonno,
tutto, tutto, avarria sacrificato.
Ma bene e sentimente nun ce ponno
quanno n’ammore nasce sfurtunato.
‘E genitore d’essa nun lle vonno
fa’ spusà ‘a figlia, si stu nnammurato
é vagabondo e senza n’avvenire …
Meglio nu viecchie zeffunnato ‘e lire!

‘O giovane tradito e disprezzato
nun se puteva cchiù capacità:
– Nfama! – diceva – lasse a mme pe n’ato?
E comme, comme ll’hê pututo fa? –
E na sera che, comm’a nu dannato
jette sott”e ffeneste p”a parlà,
vedette – ma era overo? – nfaccia ‘o muro
ll’ombra ‘e na coppia stretta dint”o scuro …

Nun ce credeva ancora: s’accustaje
pe vedé meglio nfaccia stu signore …
Dint’a ll’oscurità chillo sparje
mettenno tutt”o vico a rummore.
Comm”e ccerase vanno a chioppa ‘e guaje:
era n’amico, chillo traditore!
A Fra Diavolo ‘o sango lle sbullette,
sparaje pur’isso .. ‘e faccia … e ll’accedette!

Po’ se mettette a chiagnere, avvilito
muzzecànnese ‘e mmane smaledette.
Pe ghi’ a truvà nu monaco rumito
quanto cimme ‘e muntagne che sagliette!
– Guagliò, si overamente si’ pentito,
(stu monaco, abbracciannolo, dicette)
cerca perdono a Dio, rimmane ccà
e cerca ‘a grazia a ‘o Rre, ca ‘o Rre t”a fa!

«Maistà, pe nu destino mio crudele,
– scrivette – io stongo male cumbinato …
Sarraggio ‘o schiavo vuosto cchiù fedele:
sempe devoto a ‘o Rre ca m’ha salvato».
E ‘o Rre, piglianno tutt”e cautele,
pe cummutarle ‘a pena, l’ha mannato
pe tridece anne (‘o dette stu piacere!)
dint’a nu riggimento ‘e fuciliere.

Felice ca nun ghieva carcerato,
a Napule se jette a presentà.
E ‘o juorno ca ‘o vestettero ‘a suldato
pareva ‘o specchio d”a felicità:
cu ll’aria ‘e nu guerriero ammartenato
scurazzava p”e strate d”a città.
Fermato nnanz’a tutt”e magazzine,
ncantato se mmirava ‘int”e vvetrine!

Colonnello Michele Pezza, nato a Itri il 7 aprile 1771 e morto impiccato a Napoli l’11 novembre 1806.
La leggenda si è impadronita del personaggio e sulla scorta dei rapporti militari francesi del decennio napoleonico a Napoli, ha trasformato in brigante un pittoresco e spericolato guerrigliero che combatteva come si combatteva all’epoca, con molta audacia e pochi scrupoli.
Muore Fra’ Diavolo nel 1806 con anticipo di circa un decennio sulla nascita del Romanticismo al quale deve di essere stato sollevato a protagonista di vicende eroiche e cavalleresche che il popolo ancora oggi, dopo più di un secolo e mezzo rievoca ed esalta.
È indubbio che dalla figura dell’uomo di guerra e di guerriglia s’irradia, anche nel campo della storiografia, un fascino che continua ad impegnare persone di studio a rintracciare notizie e documenti per una più esatta biografia che conduca in maniera logica dagli inizi non chiari alla vita eroiche ed alla morte impavida.
Ma il popolo costruisce più volentieri poesia anziché storia, e il vinaio di Itri, che è il figlio del popolo, vede il suo conterraneo con tutte le aureole che storia e leggenda, in mirabile fusione, hanno acceso per tramandare un ricordo, una fierezza ed una fantasia.

fonte https://lazzaronapoletano.it/category/0003/0003-0003/page/2/